Gude, die Herrschafte,
vorab was vom Köhler: Er hatt sich gefreut, dass er in zwei Tach üwer 2500 Leit mit seinem Heimkino-Video „Nach Corona“ uff facebook erreicht hatt. Isch will das liewer nit kommentiern. Isch schreib mir hier die Finger wund un es interessiert nur e paar Leut un der … ach, isch rege mich nit uff!
Wichtiger is, dass jetzt uff facebook auch die Artikel erscheine. Isch schreib nämlich einmal im Monat im Neue Heimatblatt Rödermark. Über 14 Jahr schon. Uff de Seite „dekunrad.de“ könne Sie des alles genau nachlese.
Im Internet werde die Artikel immer mit zwei-monatiger Verspätung abgedruckt, also jetzt, wo April erschiene is, de Februar.
Gut, des is dann e bißje hinner de Zeit, awer besser als nix.
Isch hab awer schon kapiert, dass die Leit gern was gucke wolle. Demnächst kriege Sie ein Video von mir. Un des wird so blöd, da werde Sie sich wünsche, sich sowas nie gewünscht zu habbe.
Meine Verehrung
Ihne Ihrn Kunrad