Gude, die Herrschafte,
mit dem Facebook, des is so e Sach! Da kriegst du automatisch irgendwelche Persone angezeigt, un dann fragt dich des Facebook, ob du die einlade willst. Hier, da sin Gestalte dabei, manche mit Hüt odder Backebärt. Also, wenn isch so schräge Type seh, denk isch als erstes: „Den kennste doch!“ Un dann fang isch an zu grübele, an welcher Theke isch mit dem zusamme gestande habbe könnt.
Awer des mit dem Einlade… ja, komme die, wenn isch die einlade, bei mir vorbei? Das sin ja hunderte von Leit! Stell dir vor, die stehn all uff einen Schlag bei mir vor de Haustür un frage, was es zu esse gibt. Schlimmer noch, was isch zu trinke hab. Des ging mir ja schon in normale Zeite uff de Keks, awer in de jetzige Situation kommt vieleicht die Corona-Polizei un steckt misch ins Loch.
Schön is awer, dass da Leit aus aller Herren Länder dabei sin: Türke, Spanier, Italiener, Engländer, Ami, Australier. Da denkt mer dann, mer wär Kunrad internationale. Uff de anner Seit entstehe da nur weitere Probleme. Wenn isch jetzt beispielsweise ein Spanier einlad, da werd isch vielleicht „Buenos Dias, Senor Cunrado!“ verstehe, awer danach werd´s eng. Un isst der en Handkäs odder muss isch dem e Paella serviern? Bei letzterem befürchte isch unner Zugrundelegung meiner Kochkünste, dass der spanische Freund, wenn isch ihm mei Paella vor die Nas stelle, innerhalb des Bruchteils einer Sekunde uff em Weg zurück in die Heimat is.
Zusätzlich gibt es bei dene Freunde, die du finde un einlade kannst, auch jede Menge hübscher Fraue. Wie soll isch dann des anstelle? Wenn zwei uff einmal erscheine, kriege die dann Krach miteinanner? Noch schlimmer! Was is, wenn mei Fraa daheim is, wenn die klingele. Ei, dann is de Tanz da, kann isch Ihne sache.
Wie isch´s ach mit dem „Freunde einlade“ anstelle, des werd nix. Wahrscheinlich is des Facebook wie de Wind schlecht uff misch zu spreche.
In meiner Not hab isch misch an mein Internet-Berater gewandt. Der hatt gesacht, isch soll für´s erste völlig passiv bleibe, also niemand einlade un auch keine Freunsdschaftsanfrage beantworte, des würde mer dann später sehe.
Des hat misch erst emal beruhigt. Awer allen, die gefracht habbe, sach isch: „Ihr habt mein Wohlwolle un irgendwann meld isch misch bei Euch!“ Isch muss dann halt sehe, dass isch was daheim hab. Un dass mei Fraa in Kur is.
Meine Verehrung
Ihne Ihrn Kunrad