Gude, die Herrschafte,
ach was hatt isch bei meim Kunrad-Artikel im September gehofft, dass sich doch noch Leut impfe lasse un wir ein Winter mit Weihnachtsmärkte un viele Veranstaltunge habbe würde. Fakt is awer, dass die freiwillig Ungeimpfte es gebliebe sin un mir nun widder de selbe Mist wie im letzte Jahr aushalte müsse. Leider genau die Situation, die isch befürcht hab. Macht überhaupt kein Spaß, Recht zu behalte.
Isch merk üwerall, dass die Leut so langsam stinkesauer uff die Impfunwillige werde. Uff jeder „Spaßseite“ hat sich de Wind gedreht un es gibt nur noch Sprüch üwer die Ungeimpfte. Un es wird, da bin isch mir sicher, nit nachlasse.
Isch sitz da, ärger mich, dass die Rödermärker Adventsmärkte abgesagt sin, un wahrscheinlich wird´s de Fastnacht nit anners gehe. Mer könnt dorschdrehe. Soll das jetzt so bis zum St. Nimmerleinstag weitergehe?
Isch weiß auch nit, was richtisch is. Mer könne doch nit mitzugucke, wie alle Ungeimpfte langsam awer sicher krank werde. Wenn Sie e Idee habbe, sache Sie mer Bescheid, isch sach´s dann auch gleich weiter.
Ja, wenn Bier oder Woi helfe dät, dann wüßt isch en Weg! Awer bislang habbe sich Lauterbach un Konsorten in dieser Hinsicht leider nit geäußert.
Meine Verehrung
Ihne Ihrn Kunrad