Gude, die Herrschafte,
im letzte Kunrad-Artikel ging´s ja um die Nebewirkunge vom Impfe. Mir geht´s vor allem darum, dass im Herbst nit widder irgendwelche „Maßnahme“ ergriffe werde, die zwar nicht nachvollziehbar, dafür awer extrem nervtötend sind – kurz: Isch will Weihnachtsmarkt un Fassnacht!
Jetzt komme als weitere Stimmungskiller die Affepocke. Bei dene viele Affe, die um mich herum sin, dacht isch, das wär sehr ansteckend! Isses awer nit! Entwarnung!
Somit nutz isch die Zeit un geh raus in Biergärte un uff Feste. Sie sollte unbedingt Konzerte un ähnliches besuche, die Veranstaltungsbranche is nämlich noch nit aus em Gröbste raus. Die sin erst bei 70%, vergliche mit de Vor-Pandemie-Zeit. Mir müsse uns jetzt all am Rieme reiße un ausgehe, was es Zeisch hält. Mir werde doch den Mist endlich emal hinner uns bringe. Un wann dann de Putin un de Selenskyj endlich am Verhandlungstisch sitze, dann könnt´s vielleicht doch noch e gut Jahr werde.
Des wünsch isch uns all!
Meine Verehrung
Ihne Ihrn Kunrad